Vonesa dhe probleme me pajisjet e identifikimit, në këto qytete nuk ka nisur ende procesi i votimit

Shqiperi

Gazeta Express

14/05/2023 8:05

Pajisjet e identifikimit elektronik kanë shfaqur probleme në Lushnje dhe Kavajë ku ende nuk ka nisur procesi i votimit.

KQZ nuk ka dërguar zarfet me kodet e funksionimit të tyre.

Gjithashtu në Fier për shkak të problemeve me pajisjen e identifikimit në 30 qendra votimi në zona të ndryshme si Mallakaster, Patos, Rroskovec, Fier, Lushnje dhe Divjake nuk ka filluar votimi.

Shkak është bërë mungesa e komisionerëve të Partisë Demokratike. Në qendrën e votimit numër 302 nuk ka mbërritur ende sekretari.

Në Korçë ka shfaqur problem e pajisja e identifikimit Biometrik ‘PEI. Operatorët përgjegjës po mbajnë aktualisht kontakt me KQZ-në për riparimin e defektit.

Problem në disa qendra votimi në lidhje me këtë pajisje janë raportuar në Durrës, Vlorë, Shkodër, Kukës.

Ndërkohë për shkak të kësaj problematike nuk është ndaluar procesi, por po vazhdon manualisht me listë, gjithsesi procedura e votimit po vonohet.

Shqipëria voton sot për zgjedhjet lokale. Në orën 07:00 deri më 19:00, shqiptarët do i drejtohen kutive të votimit për të zgjedhur kryebashiakët e rinj.