Votimi nga jashtë, Celibashi: Përgatitja e zarfeve do të transmetohet në YouTube

Shqiperi

Gazeta Express

02/04/2025 21:56

Komisioneri Shtetëror i Zgjedhjeve, Ilirjan Celibashi, ka deklaruar se procesi i dërgimit të zarfeve me fletët e votimit për zgjedhësit jashtë vendit do të nisë nga data 8 deri më 17 prill. Ai siguroi se votuesit do t’i marrin zarfet brenda 24-48 orëve nga momenti i nisjes së tyre nga Komisioni Qendror i Zgjedhjeve (KQZ).

Duke folur mbi organizimin e këtij procesi, Celibashi theksoi se shumica dërmuese e votuesve ndodhet në Evropë, me 89% të aplikantëve nga ky kontinent, ndërsa SHBA dhe Kanadaja do të kenë një kohë dërgesë prej 3 deri në 5 ditë. Ai pohoi se 99% e votuesve të regjistruar janë nga Evropa, SHBA dhe Kanadaja, ndërsa 1% ndodhen në vende të tjera të botës.

Për sa i përket prodhimit të fletëve të votimit, Celibashi njoftoi se një kompani sllovene, e cila ka bashkëpunuar me KQZ për afro 30 vjet, është drejt përfundimit të prodhimit të tyre. Më 7 ose 8 prill, fletët e votimit do të mbërrijnë në Shqipëri, duke u pasuar menjëherë nga procesi i paketimit dhe dërgimit.

Për transparencën maksimale të procesit, Celibashi konfirmoi se KQZ do ta transmetojë live përgatitjen e zarfeve përmes 4-5 kanaleve të dedikuara në YouTube, duke i mundësuar qytetarëve që ta ndjekin atë drejtpërdrejt. Ai shtoi se këtij procesi do të mund t’i referohen përfaqësuesit e partive politike, vëzhguesit ndërkombëtarë dhe media.

“Përgatitja e dokumentacionit do të kryhet në ambientet e KQZ-së, me pjesëmarrjen e rreth 60-75 personave, të cilët do të punojnë nga ora 08:00 deri në mesnatë, derisa të dërgohen të gjitha zarfet”, tha Celibashi.