Zbulohet qendra e prostitucionit në Durrës, procedohen 6 shqiptarë dhe 2 shtetase kineze! Organizatorët në kërkim

Shqiperi

Gazeta Express

05/04/2025 12:55

Policia e Durrësit ka zbuluar një ambient të marrë me qira i cili ishte përshtatur për ushtrimin e prostitucionit.

Në kuadër të operacionit “Storm 3”, u proceduan penalisht 2  shtetase kineze të cilat kishin marrë me qira ambientin si dhe 6 shtetash shqiptarë të cilët u gjetën në banesë.

Policia po vijon punën për kapjen e organizatorëve të rekrutimit të shtetasve kineze me qëllim ushtrimin e prostitucionit.

Policia njoftoi se pas një hetimi 2-javor për veprat penale “Shfrytëzimi i prostitucionit”, “Prostitucioni” dhe “Trafikimi i personave të rritur”, finalizoi operacionin policor të koduar “Storm 3”, në kuadër të të cilit nisi procedimi penal për veprat penale “Prostitucioni”, dhe “Shfrytëzimi i prostitucionit” për shtetaset kineze R. Ë, 54 vjeçe, X. X., 41 vjeçe.

Gjithashtu u proceduan penalisht dhe 6 shtetas nga Durrësi dhe Kruja që u gjetën në banesën e dy shtetasve kineze.

Në cilësinë e provës materiale u sekuestruan dy pasaporta të shtetaseve kineze, 86400 All dhe 440 Euro dhe 3 aparate celular, disa karta telefoni dhe disa karta banke.

Nga veprimet hetimore të kryera gjatë hetimit proaktiv rezultoi se shtetaset kineze në lagjen nr.13, Plazh, Durrës, kishin përshtatur një ambient të marrë me qira, dhe ushtronin prostitucionin.