ZKM: Elbert Krasniqi “konfirmon gatishmërinë” për ta mbështetur Kurtin për formimin e qeverisë së re

Lajme

Gazeta Express

02/04/2025 22:05

Kryeministri i Kosovës, Albin Kurti, ka zhvilluar sot një takim me ministrin e Administrimit të Pushtetit Lokal dhe kryetarin e Iniciativës së Re Demokratike të Kosovës (IRDK), Elbert Krasniqi, derisa ky i fundit edhe e konfirmoi gatishmërinë për ta mbështetur Kurtin për formimin e qeverisë së re.

Në këtë takim ishte i pranishëm edhe zëvendëskryeministri i parë, Besnik Bislimi, si dhe deputeti i IRDK-së, Fridon Lala.

Zyra e Kryeministrit njoftoi se gjatë bisedës, u diskutua mbi formimin e qeverisë së re pas certifikimit të rezultateve të zgjedhjeve të 9 shkurti.

Ky takim ishte pjesë e konsultimeve të kryeministrit Kurti me partitë politike të pakicave, për të siguruar mbështetjen e tyre në ndërtimin e ekzekutivit të ri.

“Kryeministri Kurti e falënderoi ministrin Krasniqi për bashkëpunimin gjatë mandatit qeverisës, ndërsa ky i fundit konfirmoi gatishmërinë për vazhdimin e këtij bashkëpunimi dhe përkrahjen e IRDK-së në formimin e qeverisë së re”, thuhet në njoftim.