ZKM njofton për takimin e Kurtit me Berishën, s’e përmendin nëse kanë marrë konfirmim për votim të qeverisë

Lajme

Gazeta Express

03/04/2025 11:52

Kryeministri në detyrë, Albin Kurti, sot takoi disa nga deputetët e zgjedhur të partive të komunitetit joshumicë. Por, jo prej të gjithëve mori konfirmimin se do t’ia japin votën formimit të qeverisë nga ai.

Zyra e Kryeministrit përmes një komunikate njoftoi për takimin që pati Kurti me deputetin e zgjedhur, Veton Berisha, i cili është kryetar i Partisë Liberiane Egjiptiane.

Vetë Berisha në një deklarim për media tha se s’ka vija të kuqe për asnjë parti, por se kërkesë e tij mbetet më shumë zhvillim për komunitetin egjiptian.

“Kryeministri Kurti e uroi z. Berisha për mandatin e deputetit dhe rikthimin e tij në Kuvendin e Republikës. Diskutuan për procesin e konstituimit të kuvendit dhe formimit të qeverisë së re pas certifikimit të rezultateve nga zgjedhjet e 9 shkurtit. U theksua rëndësia e formimit të institucioneve brenda afateve ligjore dhe kushtetuese. Kryeministri veçoi politikat dhe vendimet e qeverisë në mbështetje të komuniteteve joshumicë, me theks te komuniteti egjiptian, të cilat kanë vënë në shprehje vëmendjen e shtuar dhe meritore që qeveria e drejtuar nga ai i ka dhënë përmirësimit të mirëqenies së qytetarëve nga radhët e komunitetit egjiptian përmes punësimit, edukimit dhe infrastrukturës”, thuhet në njoftimin e ZKM-së.

Në një komunikatë më herët ku ZKM njoftoi për takimin e Kurtit me Fikrim Damkën, njëherësh Kryetar i Partisë Demokratike Turke të Kosovës (KDTP), i cili aktualisht është ministër në detyrë i Zhvillimit Rajonal, tregoi se kanë marrë konfirmimin nga ai për votimin e qeverisë.

“Të dyja palët shprehën vullnetin dhe gatishmërinë që ky bashkëpunim i frytshëm të vazhdojë edhe në legjislaturën në vijim”, u tha në njoftim.

Ndryshe nga Damka e ngjashëm me Berishën e ka qëndrimin edhe deputetja e zgjedhur boshnjake, Duda Balje.

Ajo tha se s’ia ka konfirmuar votën Kurtit, mirëpo takimet për këtë çështje do të vazhdojnë. Ndër kërkesat e Baljes ndaj Kurtit është edhe krijimi i një komune për boshnjakët në Kosovë./Express/