ZRRE e çon përpara planin për shtrenjtimin e rrymës, “i vjen” mbështetje edhe nga jashtë vendit

Lajme

Gazeta Express

02/04/2025 19:02

Zyra e Rregullatorit për Energji (ZRRE) e ka çuar përpara planin për shtrenjtimin e rrymës, pasi njofton se i ka ardhur mbështetje edhe jashtë vendit.

Sekretariati i Komunitetit të Energjisë, me seli në Vjenë, ka shprehur mbështetje për veprimet e Bordit të Zyrës së Rregullatorit për Energji (ZRRE) lidhur me procesin e rishikimit tarifor.

Në një letër zyrtare të dërguar sot, Sekretariati ka theksuar rëndësinë e transparencës dhe pavarësisë në vendimmarrjen rregullatore, duke i cilësuar këto si elemente kyçe për një treg energjetik të drejtë dhe të qëndrueshëm.

Gjithashtu, Sekretariati ka nënvizuar se përcaktimi i tarifave duhet të jetë i bazuar në kosto reflektive, duke siguruar stabilitet afatgjatë të sektorit të energjisë dhe mbrojtjen e konsumatorëve.

Po ashtu, Sekretariati ka inkurajuar të gjitha palët e interesuara të marrin pjesë në një proces konsultimi konstruktiv me ZRRE-në, duke u bazuar në parimet e legjislacionit evropian.